Tumilapon sa daan ang isang 10-buwang sanggol at kanyang dalawang kaanak matapos silang banggain ng isang humaharurot na motorsiklo.
Makikita sa viral video na tumatawid ang mga biktima bitbit ang sanggol, gabi noong Marso 11 sa Dagupan, Pangasinan nang salpukin sila ng motorsiklo.
Nakuhanan ng CCTV sa Barangay Lucao ang pagtalsik ng lalaki at kanyang sanggol, at pamangking babae.
Patawid ang mga biktima para magpunta sa isang kainan nang mangyari ang insidente.
Kwento ng biktimang si Ronald Beltran, sa halip na tulungan sila ng driver, muli itong sumakay sa kanyang motorsiklo at mabilis na tumakas.
Nadala sa ospital ang mga biktima at nasa ligtas na kalagayan na ngayon.
Patuloy pa rin ang pagtugis ng mga awtoridad sa rider.
