“I promise you—I will listen.”

‘Yan ang sinabi ni Benhur Abalos, dating Kalihim ng DILG at kandidato sa Senado, bilang tugon sa mga isyu ng mga manggagawa at magsasaka sa bansa.

Ibinahagi niya sa mga miyembro ng Liga ng mga Barangay ang ilan sa kanyang mga plataporma, na kalaunan ay nagbigay-daan sa kanilang pagsuporta sa kanyang kandidatura.

Platapormang suportado ng barangay

Dahil sa mga platapormang nais ilunsad ni Abalos, nakatanggap siya ng malaking suporta mula sa Liga ng mga Barangay sa Pilipinas (LNB).

Isa sa mga plano ni Abalos sa Senado ay ang pagtanggal ng expanded value-added tax (e-VAT) sa kuryente at buwis sa gasolina na ginagamit sa paggawa ng kuryente.

Naniniwala siya na makakatulong ito para maging mas mura ang mga bilihin at mapalago ang mga negosyo sa mga probinsya.

Inanunsyo ng LNB ang kanilang suporta para kay Abalos sa isang national convention na ginanap sa World Trade Center sa Pasay City.

Nagpasalamat si Abalos sa mga barangay officials at nangako siyang magiging tagapagsalita para sa mga lokal na pamahalaan. “Maraming, maraming salamat sa lahat ng barangay captain ng Pilipinas sa pagsisilbi ninyo sa ating bayan,” ang sabi niya.

“Pabayaan niyo maging boses ako ng mga lokal na pamahalaan. I-empower ko kayo dahil ang susi sa ating bansa—ang magdadala sa Pilipinas ay ang barangay system natin,” dagdag pa niya.

Tugon para sa mga manggagawa at magsasaka

Nangako din si Abalos na pagsisikapang mapabuti ang kalagayan ng mga manggagawang walang benepisyo.

Ayon sa kanya, ipaglalaban niya ang mga job order at contract workers sa gobyerno na matagal nang walang benepisyo.

Hindi rin pinalampas ni Abalos ang pagpapalakas sa sektor ng agrikultura. Sinabi niyang pagsisikapan niyang magbigay ng mas madaling pautang, mababang buwis sa lupa, at mas maraming benepisyo para sa mga magsasaka, pati na rin ang pagtaas ng mga crop insurance para sa kanilang mga ani.

Sabi ni Abalos, mahalaga ang pakikinig sa mga pangangailangan ng bawat sektor upang tunay na makapaglingkod sa bayan.

“Together, we will implement programs because unity is essential for the progress of our nation,” saad niya.